نصيحة جدة الجزء الخامس
بقلم / ولاء على
يا حبيب القلب يا نور العين أسمعنى .. قلبك يا حبيبى موش هين قلبك ده جميل ويستاهل كل جميل زيه وياروحى أفهمها
صح، وأعرف اللى مايمشي لك متر ما تمشي له شبر فيها، موش الند بالند.. لأ..ماتحسبهاش كده أحسبها أنك تستاهل كل
خير الدنيا يجتمع عندك ويجيلك علشان أنت طيب وحنين وأجمل ما فى الراجل الجدع حنيته وطيبة قلبه، وأنه يكون متفاهم
وده موش ضعف ياغالى دى القوة بعينها . ولكن ياقلب ستك مادمت قررت أنك تتجوز وتبقى مسؤل؛ فالست اللى معك دى
أمانة ومسؤليتك أنك تحافظ عليها وتكرمها وأوعاك فى يوم تهينها أو تقلل منها و من كرامتها دى كرامتها يا ضنايا من كرامتك،
وخليك عارف أنها تركت بيت أهلها علشانك وعلشان تبقى معك، وحبيبك النبي محمد صلى الله عليه وسلم قال: “إنما
النساء شقائق الرجال، ما أكرمهن إلا كريم، وما أهانهن إلا لئيم” فيا ضنايا شوف بقى أنت عاوز تكون كريم ولا لئيم ؟؟ كن زوج
صالح علشان تكون هى لك خير متاع الدنيا صالحه زيك، وراعي مشاعرها وأفهمها وكن داعم قوى وسند ليها. الست مننا يا
حبيبى بتحب الراجل اللى معها يكون مصدر أمانها وقوتها وما يكون أبدا نقطة الخوف بالنسبه لهاأوالشخص اللى يكسرها،
ويكون سند بجد ليها ويدعمها فى قراراتها وأحلامها، ويكمل معها طريقها والعمر اللى باقى فى حياتها. وهقول لك كلمة حطها
حلقة فى ودانك الست لما تكون متعلمه ومستقلة وفهمه دينها صح هتراعي ربنا فيك وفى بيتها وهتريحك يا حبيبى، ولا
تعليمها واستقلاليتها يقللوا منك فى شىء أبدا دى هتلاقي نفسيتها وقلبها سليم وهتخرج لك أولاد صالحين بأذن الله
وتوفيقه فى تربيتها ؛لأنها هتحاول بقدر إمكانها تطبق اللى بتتعلمه من دينها وتعليمها عليهم عشان تخرج أولاد نفسيتهم
سوية بارين بك وبها، وكمان ياضنايا هتلاقيها عاوزة ترفعك وتشدك لفوق وعاوزة تشوفك أحسن الناس، ما الراجل يا ضنايا لو
موش فى ضهره ست قوية وداعمه له بتلاقيه ياغالى دايما فاقد لأشياء كتير من ضمنهم الدعم ما أنت أكيد بتحتاج لحد يكون
فى ضهرك برضو، والراجل بطبعه كسول إلا ما رحم ربنا ودوال بيكونوا قليل، موش هيتحرك غير لو فى حد فى ضهره بيدفعه.
..طبعا يا غالى، ما أصل صوابعك موش زى بعضها ، ولا عقول الناس واحدة، ولا حتى كلنا بنربي ولادنا زى بعض كلنا مختلفين
ياضنايا، وربك خلقنا مختلفين .. بس قيمنا وتعاليم ديننا واحدة ياغالى وأحنا بنحاول على قد ما نقدر نقتدي برسول الله ونغرس
فيكم كل طيب وجميل ، وبنتعلم تربية ولادنا كيف تكون؟؟ علشان نزرع فيهم كل حاجه حلوة وصلت لينا وأتعلمناها؛ علشان
كده قولت لك أن الست طول ماهى فهمه دينها صح ما تخاف على أولادك أبدا ولا تخاف منها. وصيتى لك ياغالى ما دمت
قررت تتجوز يبقى تختار صح، تختار بعقلك قبل قلبك وتختار ذات الدين صاحبة النفسية السوية والعقل الواعى اللى تشيل
معك وتسندك، عشان هى هتتقي ربنا فيك وتعاملك بما يرضى الله، وأنت كمان يا حبيبى كن خيرا لها ولأهل بيتك، و هوصيك
بوصية حبيبك النبى محمد صلى الله عليه وسلم عشان مافيش أجمل منها لما قال: “خيركم خيركم لأهله وأنا خيركم
لأهلي”، وقال كمان صلى الله عليه وسلم: استوصوا بالنساء خيرا، فإنهن خلقن من ضلع، وإن أعوج شيء في الضلع أعلاه،
فإن ذهبت تقيمه كسرته، وإن تركته لم يزل أعوج،فاستوصوا بالنساء”. ربنا يفرح قلبك يا ضنايا ويسعدك وأفرح بك ومعك.
