أيام زمان ….مين يفتكر
كتب/ جمال علي
مين يفتكر…. زمان ..في مصر
كان القلم الرصاص بيتبرى بموس حلاقة
كانت المكسرات و التسالى لب أسمر و سودانى و ترمس
كان لب البطيخ يتنشف و يتحمص
كان إللى يعيا ياخد حباية نوفالجين أو ريفو مع كوباية لمون و يربط دماغه بمنديل و يتغطى باللحاف و ينام يعرق يستريح لو زاد التعب ينطبخ له فرخة بلدى شامورط
كان لازم المنديل القماش فى جيب المريلة
كنا لما نشوف المدرس أو الابله فى الشارع أو الحارة فى أجازة الصيف نستخبى منه احتراما وممكن خوف .
كانت الألوان شمع وكانت أنبوبة القلم الجاف لما تفضى يتركب أنبوبة جديدة
كان لما القلم ما ميكتبش نشد السن النحاس بتاع الأنبوبة باسنانا و ننفخ فى الأنبوبة لحد ما تنزل نقطة حبر و بعدين نركب السن و القلم يكتب
كانت الكراريس و الكشاكيل بتتجلد بجلاد بنى و نلزق عليه تكت
كان جدول الضرب ورقة كرتون بتتباع فى المكتبة
كانت الألعاب بغطيان الكازوزا و بلى و نوى البلح
كان الهدوم كستور ودبلان والجزمه كاوتش بلاستك ولما نكبر نجيب جزمه من باتا
ولسه الجيل ده مكمل بالاحترام والأخلاق
