حورية كانت بتموت من الرعب، من صوت الحيوان إللى برا الكهف والصوت كان بيقرب، وهي محبوسة ورا الصخر بتصرخ بكل قوتها.. وفجأة، شق الضلمة صوت بشري قوي:
“حد هنا؟ فيه حد محتاج مساعدة؟”
حورية (بلهفة ودموع): “أنا هنا! أبوس إيدك خرجني من هنا!”
الصوت كان بعيد، وصدى الصوت في الكهف كان ملخبط الدنيا، لحد ما ظهر كلب ضخم شم ريحتها ووقف قدام الفتحة يهوهو. وبجانبه شاب ملامحه قوية بس فيها طيبة..وبجهد كبير قدر الشاب يزحزح الصخر ويخرجها، حورية أول ما شافته وشافت الكلب، قلبها وقف من الخوف وأغمى عليها.
بعد ساعة، فاقت حورية لقت نفسها في مكان مفتوح، والنار قايدة جنبها، وسامر قاعد بيبص لها بهدوء.
حورية (بتلتفت حواليها برعب): “أنت مين؟ وأنا جيت هنا إزاي؟”
سامر: “إهدي.. أنا سامر. كنت بتمشى في الجبل وسمعت صراخك، لودوس كلبي هو إللي دلني عليكي. جبتك هنا عشان ترتاحي.”
سامر: “لأن العيب مش عليهم، العيب على الناس الجاهلة إللي بتجري ورا الأوهام عشان تهرب من واقعها.”
حورية (بكسرة): “تعرف إني واحدة منهم؟ أنا كمان ببيع الوهم علشان أهرب من واقعى .. أنا قارئة تاروت.”
سامر (بص في عينيها بعمق): “إنتي مش زيهم، لأنك عارفة إنه وهم ومش حباه.. باين في عينيكي إنك مجبورة على حياة مش شبهك.”
قامت حورية مع سامر، أخد إيدها يتفرجوا على السرك ، ولأول مرة حست بنسمة هوا نضيفة بعيد عن خنقة الكهف. ضحكت من قلبها، وسامر بصلها وقالها: “نفسك في إيه دلوقتي يا حورية؟”
حورية: “سؤال غريب! أول مرة حد يسألنى نفسك في إيه نفسي أكون حرة.. ومكنش خايفة، وأبطل أمثل على الناس شخصية غير شخصيتى الحقيقة وأعيش في سلام وأطمن.”
سامر: “إنتي حرة فعلاً.. بس أفكارك هي إللي مكتفاكي بالخوف.”
حوريه(بحزن): إزاى يعنى !!
سامر: يعني جربى دلوقتي تقومى تجرى تحسي بدفئ الشمس وتخدى نفس عميق وتتأملى الطبيعية وتخلى نور الشمس يملى قلبك هتحسي إنك حرة
وسامر ياخد إيد حوريه ويفضلوا يجروا ويضحكوا من قلبهم
وفي نفس الوقت.. قدام قصر الملك
أفنان وصلت وهي متخفية تحت شال إسود، بتراقب “عزيز” وهو داخل وخارج، قلبها مليان غل. وفجأة، وقفت قدامها فاطيمة (زوجة الملك).
فاطيمة: “إنتي مين يا ست إنتي؟ وواقفة هنا بتراقبي القصر ليه؟”
أفنان (غيرت صوتها وبقت بتمثل): “أنا ست غلبانة، بقرأ الكف وبدور على لقمة عيش.. تحبي أشوفلك بختك يا هانم؟”
فاطيمة: “إمشي من هنا بدل ما أسلط عليكي الحرس يرموكي ورا الشمس!”
أفنان (بهمس زي فحيح الحية): “على فكرة.. جوزك الملك ناوي يقتلك. بيخونك مع واحدة من ماضيه إسمها ‘أفنان’.. خدي بالك من نفسك بدل ما تبقى ذكرى منسيه وتخسرى كل إللى إنتى عايشه فيه ده فى لحظة واحدة”
فاطيمة (بصراخ ورعب دارته بالقسوة): “بره! خدوها من قدامي! ولو شوفتوا وشها تاني إعدموها!”
لكن كلام أفنان زرع الشك في قلب فاطيمة.. وبدأت تسأل نفسها: “مين أفنان دي؟ وهل عزيز فعلاً يقدر يغدر بيا؟”
وفى السيرك حورية
حورية (بصوت مخنوق ونظرة تائهة):
أنا بنت الملك.. تخيل؟ أنا بنته إللي بشوفه كل يوم من بعيد، زي الغريب إللي بيراقب مكان ممنوع يدخله. ممنوع أكلمه غير بخطه أفنان، ولا حتى أتأمل ملامحه من قريب، لأنه أصلاً ميعرفش إني موجودة. أفنان أمى كانت حبساني في الكهف علشان قولتلها إنى هقول للملك إن أنا بنته، هما كانوا بيحبوا بعض زمان، وأفنان كانت جارية وهو الأمير الطموح.. إتفقوا يهربوا، ويتحدوا الدنيا كلها عشان حبهم، بس هو خذلها. باعها وباع الوعود وإتجوز بنت أكبر تاجر عشان الكرسي والتاج.
وأبو الملك طرد أفنان من الجزيرة وبعدها عن أهلها ، أفنان لما راحت مخدتش معاها غير نار الإنتقام إللي كانت بتكبر في قلبها.ربتنى وكبرتني على الكره، علمتني أقرأ “التاروت” عشان أرسم خيوط اللعبة، وخلتني أعرف الملك مكانها عشان يرجع يحبها وتقدر تكسره.. بس أنا قلبي تعب، أنا مش زيهم، مش عاوزة دم ولا انتقام، أنا بس عاوزه أعيش حياة حقيقية.. حياة مفيهاش
خنا جر مستخبية ورا الضحكات.
سامر (بيقرب منها وبيمسك إيدها بضغط حنين):
معايا أنا.. هنبدأ من الصفر. هنبني حياة مفيهاش ملوك ولا عبيد. حورية.. تقبلي تتجوزيني؟
حورية (بصدمة ودموع محبوسة):
أتجوزك إزاي؟ أنت مش فاهم إنت بترمِي نفسك في إيه! إنت ممكن تتأذى بسببي. أفنان دلوقتي بتدور عليا عشان تكمل خطتها، وحراس الملك لو لمحوني هيقتلوني عشان يدفنوا السر ده للأبد. إنت بتبني قصر وسط عاصفة يا سامر
سامر (بثبات وصوت واثق ):
وأنا مش هطمن عليكي غير وإنتي جنبي.. تحت عيني. وجعك ده مش هيداوه غير إني أشيله معاكي.
حورية (بابتسامة باهتة):
وإنت بقى غاوي مغامرات ومشاكل؟ ولا الكلام ده بتقوله لأي بنت عشان تسرق قلبها؟
سامر (بيسرح لبعيد):
أنا متربي طول عمري في السيرك، وسط الأسود وغدر الحيوانات. قلبي مات من زمان، الخوف ميعرفش طريقي. بس لما سمعت حكايتك، حسيت إن جرحنا واحد، وكأن الوجع إللي في صوتك هو الصدى بتاع وجعي أنا.
حورية (بتعجب وحزن):
حكايتنا زي بعض إزاي؟ هو إنت كمان أبوك ملك وميعرفش إنك ابنه؟
سامر (بضحكة مكسورة):
لا، مش بالظبط كده. أنا أصعب بكتير.. أنا معرفش أبويا ولا أمي، ولا أعرف ليا أصل في الدنيا دي. كبرت في السيرك ده، والناس بيقولوا إنهم لقوني وأنا عندى شهر، محبوس في قفص مع الكلاب! كانوا مستغربين إزاي الكلاب ما نهشت نيش، ومين إللي قلبه حجر رمانى الرمية دي؟ كبرت وسطهم لحد ما بقيت أشطر مدرب كلاب.. يمكن عشان هما أوفى بكتير من البشر اللي رموني.
حورية (بصوت حزين):
يا وجع القلب.. إزاي في ناس بالبشاعة دي؟ معقول مفيش في قلوبهم رحمة؟ طيب مفكرتش تدور على أهلك؟ يمكن تكون إتخطفت، يمكن في أم قلبها محروق عليك؟
سامر (بنظرة باردة):
أدور عليهم ليه؟ بقالي 30 سنة غايب، ومحدش فيهم كلف نفسه يدور، أو يسأل، أو حتى يعلق ورقة بصورتي. ليه أجري ورا سراب باعني من أول نفس ليا في الدنيا؟
حورية (بتنهيدة طويلة):
غريبة الدنيا دي يا سامر.. لا إللي عارف أهله مرتاح، ولا اللي تاه من أهله مرتاح. كأن الوجع مكتوب علينا بكل الأشكال.
سامر:مش فارقة.. في الآخر النتيجة واحدة، إحنا الاتنين موجوعين أنا شخص واقعي، السيرك علمني إن اللي بيسرح في الخيال بيقع من فوق الحبل ويموت. مش بحب أتخيل سراب.. بس لما شوفتك، بدأت أتخيل حياتنا تخيلت الأمان إللي عمري ما دقته، والإستقرار إحنا الاتنين محتاجين بيت هادي، بعيد عن نار الإنتقام وريحة الماضي. إنتي الوحيدة إللي هتفهمي يعني إيه الواحد يبقى غريب وسط الناس، وأنا هفهم غُربتك.
حورية (بدموع نزلت غصب عنها):
أنا أول مرة في حياتي أجرب أثق في حد.. إنت مش فاهم الرعب اللي جوايا. كلامك عن شكل حياتنا جميل أوي، زي الحلم إللي كنت بخاف أحلمه.. بس وجع الواقع بيشدني لتحت، بيخليني خايفة أغمض عيني وأصدق، فأصحى ألاقي نفسي لسه في الكهف لوحدي.
حورية كانت لسه هترد، ولسه بتبدأ تحلم معاه.. وفجأة، النور إتطفى، وظهر ظل طويل ومرعب ووراه، صوت مخيف وصارم قطع هدوء المكان وهو بيقول:
“إنتي هنا بتعملي إيه؟!!!”
