كتب/جمال علي
الفنان الجميل يونس شلبي كان ليه قصة صعبة اوي وللاسف اتعرفت بعد وفاته بفترة.
يونس اصلا اتجوز وهو عنده ٤٢ سنة .. وكان قاصد يختار حد من خارج الوسط الفني عشان كده اتجوز مدام سيدة بلدياته من مدينة المنصورة وخلف منها ٣ بنات وولد.
بعد تعب وشغل سنين جمع يونس تحويشة العمر واشترى بيت وعمل شقة لكل بنت من بناته كنوع من تأمين المستقبل لكن للأسف لما بدأ يتعب في نهاية التسعينات بدأ الشغل المعروض عليه يقل وبالتالي مفييش فلوس داخلة يصرف منها.
عشان كده لما اشتد عليه المرض وبقى قاعد في السرير اضطرت زوجته انها تبيع البيت ومستقبل الاولاد عشان توفر مصاريف علاج زوجها وتكاليف عملية القلب المفتوح اللي سافر عملها بره مصر خصوصا ان ولاده كانوا لسه في المدارس ومفيش حد فيهم يقدر يتحمل مسئولية مصاريف العيلة.
توفي يونس سنة ٢٠٠٧ وحرفيا عائلته ما كانش عندها اي دخل لدرجة ان زوجته حكت انها اضطرت تنقل سكنهم في شقة صغيرة في منطقة شعبية وده خلاهم ما يقولوش للناس انهم عيلة يونس شلبي عشان الناس حتستغرب من المستوى اللي عايشين فيه لأنهم فاكرين كل الفنانيين نايمين على خميرة محترمة.
في اخر لقاء لزوجة الراحل يونس شلبي قالت ان مصدر دخلهم الوحيد هو معاش النقابة لدرجة وانها عانت عشان تقدر تصرف على ولادها ويتعلموا وكمان ناشدت المسئولين انهم بس يوفروا فرصة عمل لبنته الصغيرة اللي كانت لسه متخرجة من الجامعة.
للاسف الناس اللي اشتغلت زمان في الفن اشتغلت عشان بتحب الفن عشان كده ما كانش همهم الفلوس قبل ما الفن يتحول لتجارة ونسمع الارقام اللي بنسمعها بتدفع دلوقتي لأنصاف المواهب.
رحم الله الفنان الجميل يونس شلبى..
